zona de soñadores

fágome neno

untalmarra — Mon, 28 Nov 2011 13:13:37 +0000

.

ás veces envexo

aos nenos

que falan con todo

e fágome neno

olá, almofada

bos dias!

que ben durmimos esta noite

abrazados

e fuches quen eu quixen

e fun quen ti quixeches

meu amor brando das noites

compartimos soños

e emociós

miña caloriña

comodín dos meus abrazos

.

soño

untalmarra — Tue, 25 Oct 2011 22:20:25 +0000

.

levabas tres dias

durmindo no sofá

pero esta noite

no médio do meu sono

acurruncháchete silandeira

no meu leito

.

abraceite

e durmimos coma nenos

.

.

amarte

untalmarra — Wed, 19 Oct 2011 22:32:12 +0000

.

irei

contigo

a marte

muller

do abrazo verde

.

agora

untalmarra — Sun, 04 Sep 2011 23:17:28 +0000

.

agora

que xa

non entendo

nada

comezo a comprender

as preguntas

.

óllame

untalmarra — Tue, 12 Jul 2011 00:58:29 +0000

.

óllame

antes de que a dor floreza

mírame

antes de que o tempo cale

.

antes de que o mar rebente

espeta os teus ollos

na miña pel

e nos cantís do meu corpo

.

antes de que o sol se apague

e se pechen as curvas totalmente

óllame

.

chove e escampa

untalmarra — Thu, 31 Mar 2011 16:52:05 +0000

.

chove e escampa chove e escampa

chove e escampa

o sol brilla na erva mollada

coma un saxofón

fai escalas de luz

as nubes pulsan as chaves e dosifican

a cantidade xusta de sol

a love supreme

ceo gris follas verdes terra mollada

domingo

.

no cume

untalmarra — Sat, 12 Mar 2011 22:25:17 +0000

.

no cume non medra nada

non hai vexetación

.

nen os sentimentos

– que son as árbores da alma —

medran no cume

.

non hai no centro augas definitivas

todas fluen

corren cara a unha vertente

ou cara á outra

.

eu son

untalmarra — Thu, 03 Feb 2011 01:49:52 +0000

.

sae o sol

inconmensurábel

nos latexos da vida

as pedras frias que sento nas xemas dos dedos

érguense coma ósos

ferve o horizonte mañá

hoxe onte

agora

xa

.

eu son

o meu corpo

eu son o meu sangue

eu son os meus ritmos

e os meus impulsos

sen medida

.

somos acaso

untalmarra — Mon, 13 Dec 2010 22:15:11 +0000

.

somos acaso

a agulla

do xiradiscos

.

imos lendo o sulco

no disco da vida

que xa está

escrito

?

.

o ceo

untalmarra — Sun, 07 Nov 2010 02:06:33 +0000

.

a próxima vez

verémonos nun lugar neutral

comezarei a camiñar cara a ti

comezarás a camiñar cara a min

e onde nos atopemos

montaremos as nosas tendas

e fumaremos a pipa da paz

e tusiremos polo fume

pois a paz irrita os corazós dos guerreiros

coma ti e coma min

e ollaremos o campo ata que sexa

o meu campo e o teu campo

e sentiremos o ar

ata que sexa o meu ar e o teu ar

e escoitaremos o rio ata que sexa

o meu rio e o teu rio

baixo do teu ceo

baixo do meu ceo

.