óllame

.

óllame

antes de que a dor floreza

mírame

antes de que o tempo cale

 .

antes de que o mar rebente

espeta os teus ollos

na miña pel

e nos cantís do meu corpo

 .

antes de que o sol se apague

e se pechen as curvas totalmente

óllame

.

chove e escampa

.

chove e escampa chove e escampa

chove e escampa

o sol brilla na erva mollada

coma un saxofón

fai escalas de luz

as nubes pulsan as chaves e dosifican

a cantidade xusta de sol

a love supreme

ceo gris follas verdes terra mollada

domingo

.

no cume

. 

 

no cume non medra nada

non hai vexetación

.

nen os sentimentos

— que son as árbores da alma —

medran no cume

.

non hai no centro augas definitivas

todas fluen

corren cara a unha vertente

ou cara á outra

 .

eu son

.

sae o sol

nos latexos da vida

érguense as pedras frías

e síntoas nos dedos

ferve o horizonte

hoxe onte

agora

xa

.

eu son

o meu corpo

eu son o meu sangue

eu son os meus ritmos

e os meus impulsos

sen medida

.

somos acaso

.

somos acaso

a agulla

do xiradiscos

.

imos lendo o sulco

no disco da vida

que xa está

escrito

?

.

os ceos

.

a próxima vez

verémonos nun lugar neutral

comezarei a camiñar cara a ti

comezarás a camiñar cara a min

e onde nos atopemos

montaremos as nosas tendas

e fumaremos a pipa da paz

e tusiremos polo fume

pois a paz irrita os corazós dos guerreiros

coma ti e coma min

e ollaremos o campo ata que sexa

o meu campo e o teu campo

e sentiremos o ar

ata que sexa o meu ar e o teu ar

e escoitaremos o rio ata que sexa

o meu rio e o teu rio

baixo do teu ceo

 baixo do meu ceo

.

hoxe preciso

.

hoxe preciso dos teus ollos

para vivirme neles

na sua luz

preciso da tua boca

que o teu riso me anegue

ollarte sen preguntarme nada

e respirar a nosa paz

.

verdade que doe

.

non ti non es

a miña liberdade

ela non é tan fermosa

.

 poderás selo un minuto

un dia un mes

un ano talvez

.

pero despois serás

o grillón que me prende

a unha cadea

.

ou viceversa

.

as fontes

.

escoitar

a pureza das fontes

sen contaminala

.

a memória

o testemuño dos vellos

.

a soidade

.

a soidade é

unha caixa de plástico

unha cervexa nun bar

a soidade é

un semáforo vermello

a soidade é

un menú do dia

unha planta chea de eirugas

a soidade é

a veciña fumando na sua xanela

a soidade é

un teléfono soando na casa contígua

un siléncio no ascensor

a soidade é

unhas palabras de ascensor

a soidade é

un iogur con mel

a soidade é

teclear un poema

.